د نرسانو د مهارت اساس

د د نرسانو د مهارت اساس کتاب د نرسنګ د بنسټيزو اصولو، عملي مهارتونو او د ناروغانو د پاملرنې په اړه يو مهم تدريسي اثر دی. دا کتاب د نرسنګ زده‌کوونکو ته هغه اساسي مهارتونه ورزده کوي چې په روغتون، کلينيک او نورو روغتيايي مرکزونو کې ورته اړتيا وي. په کتاب کې د ناروغ د حالت ارزونه، د حياتي نښو معلومول، د درملو سم استعمال، پيچکارۍ، د زخمونو پانسمان، سېروم لګول او د ناروغ د شخصي پاکوالي ساتلو طريقې بيان شوې دي. همدارنګه د ناروغ د بستر برابرول، د ناروغ انتقال، د خوړو ورکولو اصول او د استراحت مناسبې طريقې هم پکې تشريح شوې دي. کتاب د انتاناتو د مخنیوي لپاره د حفظ الصحې اصولو ته ځانګړې پاملرنه کوي. د لاسونو مينځل، د طبي وسايلو تعقيم، د ککړو موادو خوندي لرې کول او د ناروغ او نرس د خونديتوب اصول پکې شامل دي. په دې اثر کې د بېړنيو حالاتو لومړنۍ مرستې هم بيان شوې دي، لکه د زړه درېدو پر مهال عاجله مرسته، د وينې بندول، د سوځېدو او ټپونو درملنه او د بې‌هوښۍ پر مهال د ناروغ ساتنه. کتاب د نرس اخلاقي او انساني مسؤليتونه هم روښانوي. نرس بايد له ناروغانو سره په احترام، مهربانۍ او صبر چلند وکړي، د ناروغ راز وساتي او د هغه روحي حالت ته پاملرنه وکړي. د کتاب اساسي موخه دا ده چې نرسنګ زده‌کوونکي د علمي پوهې او عملي مهارتونو له لارې داسې وروزي چې وکولای شي د ناروغانو خوندي، منظم او انساني خدمت ترسره کړي.